У Брэсце 22 чэрвеня прэзентавалі кнігу "Аперацыя "Баграціён". Партызаны беларускай зямлі…", перадае карэспандэнт БЕЛТА.
У Музеі абароны Брэсцкай крэпасці арганізавалі круглы стол, прысвечаны абароне гістарычнай праўды пра Вялікую Айчынную вайну. Падчас мерапрыемства была прэзентавана кніга літаратурна-выдавецкага праекта "Бібліятэка Саюзнай дзяржавы" – "Аперацыя "Баграціён". Партызаны беларускай зямлі…". Ілюстраванае выданне прысвечана 80-годдзю вызвалення Беларусі ад нямецка-фашысцкіх захопнікаў. Аўтары пастараліся, каб кніга была цікавая школьнікам, дарослым і спецыялістам у галіне гісторыі.
"У дзень пачатку Вялікай Айчыннай вайны запрасілі аўтарытэтных людзей да размовы пра тое, што трэба зрабіць сёння, каб захаваць гістарычную праўду, каб перш за ўсё маладыя людзі (расіяне, беларусы, прадстаўнікі краін Садружнасці, дружалюбных краін) разам з намі справядліва ацэньвалі подзвіг савецкага салдата і савецкага народа, які разграміў фашызм, – сказаў дзяржаўны сакратар Саюзнай дзяржавы Дзмітрый Мезенцаў. – Мы прадстаўляем сёння трэцюю кнігу з серыі "Бібліятэка Саюзнай дзяржавы" – "Аперацыя "Баграціён". Партызаны беларускай зямлі…".
Кніга атрымалася ўнікальнай. Яна створана ва ўзаемадзеянні з архіўнымі супольнасцямі Беларусі і Расіі, міністэрствамі абароны і юстыцыі. Уклад унеслі і звычайныя людзі, якія захавалі ў хатніх архівах дакументы, якія прадстаўлены ў гэтым выданні. Першыя асобнікі кнігі накіраваны ў адрас Прэзідэнта Беларусі Аляксандра Лукашэнкі і Прэзідэнта Расіі Уладзіміра Пуціна.
Выданне змяшчае эксклюзіўныя фатаграфіі, малюнкі, баявыя лісткі, якія ўпершыню прадстаўлены шырокай публіцы. "Хочам, каб і кніга, і флэш-карта прыйшлі ў бліжэйшыя тыдні і месяцы ў навучальныя ўстановы Беларусі і Расіі. Не для таго, каб яны ляглі на паліцы бібліятэк, а каб гэта кніга стала падставай і прычынай да вялікай размовы", – падкрэсліў Дзмітрый Мезенцаў.
У круглым стале прымаюць удзел беларускія і расійскія дзяржаўныя дзеячы, журналісты, гісторыкі, супрацоўнікі музеяў і архіваў. Некаторыя спікеры падключыліся да мерапрыемства ў анлайн-рэжыме. –0–
Фота Паўла Арлоўскага
